Já ég skal bara viðurkenna það strax. En nú á ég 3 bíla og þeir eru jafnvel allir til sölu ef einhvern vantar bíl.

ÉG var að taka til í bílskúrnum hjá mér og fann þar 7 manna Kia Carnival 2000 árg, þarfnast lagfæringar og aðhlynningar fæst á 170 þúsund.  Voða góður bíll, ásett verð á bíl í lagi er c.a 600 þúsund en ég nenni ekki að laga hann.

Svo var þarna VW Golf, árg 99, svaka sætur með topplúgu og alles. Fæst á yfirtöku á láni sem er c.a 300 þúsund, 22 þús á mánuði.

Í einu horninu var svo Kia Picanto, lítið notaður 2005 árgerð, krúttlega blár á litinn, eyðir 4.9 l á hundraðið. Hann er líka falur gegn yfirtöku á láni sem er eitthvað hærra, í kringum 800 þús.

Ef þig hafið áhuga, þá bara hafa samband.

Já þetta er ekki af því að ég hafi læknast af fíkninni og ætla að hjóla á enda veraldar. Nei ÉG ÆTLA AÐ FÁ MÉR JEPPA, og ég kem honum ekki fyrir í skúrnum með alla þessa bíla þar. Svo vantar okkur tilfinnanlega meira pláss þarna inni.

Ég gæti stofnað fyrstu bílasölu Hvanneyrar, hmm hljómar vel. Verst að bílasalar eru yfirleitt að selja bíla fyrir aðra. En já mínir 3 eru kannski byrjunin.

Jæja nóg bull í bili. Heyrumst síðar

Kveðja

Ellý Carsaleswoman.

Jamm ég blogga núna af einskærri skyldurækni, farin að fá símhringingar þess efnis að ég eigi að fara að blogga.

En ég lærði eitt í dag, "ekki halda að nokkur dagur sé svo slæmur að næsti geti ekki orðið verri"

 Dagurinn í gær var vægast sagt hræðilegur. Til að fara yfir það í grófum dráttum þá skeit kötturinn á herbergisgólfið (Á fötin mín), ég skellti fötunum í þvott og 20 mínútum síðar komst ég að því að þvottavélin lak semsagt öllu vatninu á gólfið. (þarna var klukkan 7.20) Margrét Rós sullaði herbalife sheik á gólfið stuttu síðar og það út um allt. Ég ætlaði að hjóla í vinnuna en nei þá var ekkert loft í dekkjunum á hjólinu. Ákvað því að fara á bílnum þar sem allt stefndi í að ég yrði töluvert seinni en vanalega, þá vildi bíllinn ekki fara í gang nema með hjálp svo ég varð að grípa til starttækisins og aðstoða hann við að gangsetjast. (Klukkan orðin 8 og ég sein að öllu) Svo fór ég með Margréti á leikskólann og Guðjón í skólann og trítla í vinnuna (ef ég legg bílnum á milli leikskólans og grunnskólans og labba í vinnuna og Guðjón í skólann mitt á milli þá sko sparast nokkrar mínútur, útpælt í sveitarfélagi sem það tekur ekki nema 5 mínútur að labba enda á milli) Ok ég mæti í vinnuna mjög fegin yfir því að nú hljóti allt að lagast. En þegar hafragrauturinn var farinn að detta úr höndunum á mér, bláberjasúpan að fljúga úr skálum, kaffi að sullast um allt og 8 börn með niðurgang var ég nokkuð viss um að dagurinn í heild sinni var HEILHVEITI. Og ég fór heim með því hugarfari og fullyrti að næsti dagur yrði fullkominn, og ég ætli að vinna 10 milljónir í Víkingalottóinu.

En eitt er víst, dagurinn í dag er langt frá því að vera fullkominn, og hlutirnir sem gerðust í gær bara smámunir, það voru þó bara venjulegir hlutir á hraðferð á vitlausum stöðum. Maður á ekki að láta svona lagað pirra sig. Allt þetta reddaðist, jú ég þurfti að þrífa helling meira en mig langaði til, og já ég var seinni en vanalega. Skítt með það, njótum tímans sem við höfum, þökkum fyrir fólkið í kringum okkur því allt þetta bæði hrakföllin og þetta skemmtilega gerir okkur að því sem við erum, og er það sem við höfum.

Takk fyrir mig. Takk fyrir ykkur. Takk fyrir allt.

Kveðja

Ellý djúpt hugsandi í dag.

p.s ég er ekki hætt við að vinna 10 milljónir í lottóinu samt.

Jæja þá er þessarri ævintýraferð lokið. Hún var í alla staði frábær.

Ég kynntist helling af nýju fólki, verslaði annann helling, labbaði líka helling. Lærði að galdra og að drekka bjór

Og þetta allt áður en að ráðstefnan sjálf hófst. Merkilegur árangur finnst mér. 

Ráðstefnan var svo frábær, vorum þarna 18.000 manns saman komin í Kölnarena og dúndrandi stuð. Lærðum mikið og höfðum gaman. Við íslendingarnir vorum á bilinu 180- 200.

Hef ekki orku í lengra blogg í bili.

Hafið það gott, kveðja

Ellý bjóráhugakona

Góðan daginn!

 Nú er ég í góðu yfirlæti hjá móðursystrum mínum í Reykjavík. Er sko ekki í flugvélinni af því að flugi mínu var seinkað um nokkrar klukkustundir eða frá kl 7.00  til 16.40. Nú bara sit ég og bíð og safna tilhlökkun og stressi.

Frekar skrýtið að vera án barnanna ég verð að viðurkenna það, en við höfum aldrei verið aðskilin svona lengi, við Guðjón aldrei lengur en 4 daga og við Margrét ekki lengur en c.a sólarhring

En þetta reddast, ég mun sko skemmta mér vel, þannig líður tíminn hraðar.

Nú segi ég bara bless í bili og heyrumst síðar, aldrei að vita nema að ég bloggi í ferðinni (þ.er ef ég kemst í tölvu)annars kemur ferðasagan þegar ég kem heim, eftir c.a viku.

Auf widersehen!!!

Ellý

ég er að verða með lélegri bloggurum á landinu, þ.e.a.s ef maður getur talist bloggari þegar maður bloggar sjaldnar en aldrei. 

En já þannir er svo komið að ég fer til Köln eftir c.a 7 daga, þann 24.júlí og mun dvelja þar í 6 daga. Er þetta spennandi mjög og mikill fiðringur farinn um mig. Ég hef fengið í hendur í gegnum tölvuna mína (með aðstoð prentarans) farseðilinn, eða kannski bara bókunarnúmerið og er búin að prenta út miðann á þjálfunina, nafnið á hótelinu ásamt heimilisfangi svo ég geti mögulega ratað. Einnig hef ég fundið til vegabréf mitt og enn einnig örfáar flíkur sem notast skulu í ferð þessarri.

Semsagt töluvert langt komin með undirbúning. Og spennan bara magnast.

Á fimmtudagskvöldið er ég að fara að aðstoða við snyrtivöru kynningu, svo er eitt og annað að gerast svona til að stytta biðina, t.d magnast stressið í maganum ofl sniðugt.

Ég er búin að redda mér fari á flugvöllinn (eiginmaðurinn ætlar að vera svo sætur í sér að skutla konunni) en að komast heim er öllu verra ( eiginmaðurinn vill ekki leysa mig úr tollinum) hehe nei grín, hann er að vinna þá.

En það reddast, að komast heim frá leifstöð hefur einu sinni reynst flókið og þá átti ég bíl á bílastæðinu þar fyrir utan, ég sé ekki að það skipti nokkru máli fyrir mig. Kemst alveg jafnt heim með engan bíl eins og með bíl en enga lykla.

En þetta er orðið meira en nógu langt blogg í bili, sennilega mun ég blogga aftur áður en ég fer út en það er þó ekki eitthvað sem hægt er að treysta á

Bestu kveðjur í bili

Ellý sem kann eina setningu í þýsku, Ich bin einen kugleschreiber (er ekki viss um að hún nýtist í ferðinni, nema þá helst að mig vanti að komast inn á geðdeild þar í landi)

... til tilbreytingar

Held samt að ég hafi ekkert merkilegt að segja. Jú nú eru bara 2 vikur þar til ég fer til Þýskalands, eða sennilega verð ég komin þangað á þessum tíma eftir 2 vikur farin að sötra bjór og spá í hvað ég eigi að versla mér daginn eftir. Ég nefninlega lenti í því að þurfa að taka flug 24.júlí í staðinn fyrir 26.júlí, agalega sorglegt hehe eða ekki. Verð semsagt 3 daga að dúllast í Köln, barnlaus og kalllaus. Þá verður nú verslað og gert eitthvað til gamans.

Ekki það að mig hlakki til. HAHAHA. BARA GET EKKI BEÐIÐ!!!

Annað fréttnæmt, jú ég er 1kg léttari og 1cm minni (af þessum 4 stöðum sem ég mæli mig) sem þýðir að í heildina er ég slatti kg léttari og heilum 69 cm minni, á þverveginn. Myndi varla sjást ef það væri langsum. Ég er nokkuð sátt við það allt saman. Því minna sem til er af mér hlýtur að þýða minna vesen.

Í fyrra þegar "kviknaði í mér" úti í London, eða réttara sagt þegar ég skaðbrann, þá hefur eitt merkilegt gerst. Mér er fært að taka lit. Ég fór í sund í gær og fékk brúna slikju á búkinn, sko þar sem sundbolurinn var ekki. Það hefur bara ekki gerst fyrr. Sem náttúrulega þýðir það að ég er að fara í sund á eftir. Verð sko brún og sæt áður en ég veit af.

Jæja nenni ekki meiru í bili, geðveikislega gott veður 20 stiga hiti segir á www.skessuhorn.is svo það er um að gera að fara að brúna sig. hehe.

Heyrumst, mun fljótlega koma með to do lista fyrir ferðina.

Kveðja

Ellý supervisor.

Jæja, þá getur maður slakað aðeins á. Stess undanfarinna vikna aflétt að mestu.

Já ég er semsagt að fara til Köln 26. júlí á þrusu Herbalife ráðstefnu og skemmtun. Hlakka svakalega mikið til. Eiríkur er að vinna þannig að hann kemst ekki með í þetta skiptið en pottþétt næst.  Þetta verður þvílíkt fjör, hef ekki trú á öðru.

Annað fréttnæmt er eitthvað lítið...

...jú sumarfríið byrjar á morgun, það verður svakalega notalegt. Vonandi fer ég bara til mömmu um helgina í grill og afslappelsi, skemmtilegheit og dekur eins og alltaf.

Jamm ætla að finna til allt það skemmtilega sem ég ætla að koma með í vinnuna á morgun, hef ákveðið að skapa party stemmingu með blöðrum og alles allann daginn sérstaklega í hádeginu, neiiii grín.

Bestu kveðjur í bili

Ellý Kölnarfari

... væri bara sniðugt að blogga.

Nú eru bara örfáir dagar í sumarfrí, síðasti vinnudagurinn er föstudagurinn 29.júní, þó börnin séu yndisleg og samstarfsmanneskjan ekki síðri þá er voða næs að vera að fara í sumarfrí. Næstu dagar verða reyndar rólegir, örfá börn fyrir hádegi og enn færri eftir hádegi. Enn eitt barnið hætti í dag og færði okkur geggjaða gjöf, kaffibolla og súkkulaði það kætir kaffi og súkkulaðikellingar eins og okkur mikið!!!

Mikið veit ég samt ekki hvað ég á að segja, allur minn kraftur þessa dagana fer í að komast til Köln í lok Júlí, það stefnir þó í að það takist svo það verður bara fjör. Kallinn ætlar með mér og allt hvað eina (hræðilega oft það í þessarri setningu)

Jamm og já.  Það er nefninlega það sko. Djöfull er ég tóm í dag og samt heillangt síðan ég bloggaði síðast. Hefur virkilega ekkert gerst í mínu lífi. Ja hérna. Jæja ég get alla vega bloggað í byrjun ágúst, ferðasöguna til Þýskalands

Kveðja

Ellý

Já gáfuleg fyrirsögn, hafði ekki hugmyndarflug í meira

Þessa dagana er nóg að gera í sveitinni sko. Í dag var síðasti skóladagur í GBF okkur til mikillar ánægju, nú eru bara skólaslitin framundan þann 6.júní kl 14, semsagt ekki víst að ég komist á þau. Fótboltaæfingarnar byrjaðar hjá gaurnum, en hann er á þriðjudögum og fimmtudögum seinnipartinn á vísum stað uppi á fótboltavelli, það eru sennilega einu stundirnar þar sem hægt er að ganga að Guðjóni Helga vísum.

Margrét Rós er alltaf í leikskólanum núna í sumar flyst hún tímabundið um deild og verður því á Álfheimum í stað Hulduheima, og líkar bara vel held ég. Kemur samt fullkomlega í ljós á mánudaginn Hún kann helling að tala skvísan, þrátt fyrir að ganga núorðið undir nafninu mállausa barnið. Já það kom til út af því að hún var sett í orðaforðakönnun, leikskólinn fór að hafa áhyggjur af henni þar sem barnið bara sagði ekki aukatekið orð, mikið öfunda ég þær, krakkinn talar stanslaust hérna heima.

Vinnan mín verður rólegri með hverri vikunni held ég bara, núna eru bara 7/6 börn í stað 8/7 og eftir miðjan júní verða þau 6/5 það verður rólegt, hehe. Svo til að vega upp á móti þessum rólegheitum fórum við Svandís (herbalifevinkona mín) af stað með Heilsuklúbb á Akranesi, hann verður alla miðvikudaga og einn laugardag í júní, það er spennandi verkefni.

Eiríkur vinnur og vinnur, fer reyndar í 3ja vikna frí eftir morgun daginn. Það verður gaman, þó ég verði reyndar að vinna, en við hittumst þó alla vega meira en við höfum gert undanfarið.

Meira???? Jú það er til 54 cm minna af mér en á síðasta ári, og það ekki á langveginn (enda ég ekki löng, yrði sennilega að holu ef ég myndi minnka svo mikið í þá áttina.) mér finnst það svo helv... gaman að ég varð að klína því með.

Svo er það ein spurning að lokum:

Myndi einhver heilvita manneskja skrifa "peysa" svona = peisa????

Kveðja í bilos

Ellý

Herbalife

Já ég ætla helst að losa mig við slatta af skipulagsáráttu minni, henni fylgir einn galli, það gerist ekkert af því sem skipulagt er hehehe.

Annars langaði mig bara að blogga, leiðinlegt að horfa alltaf á sama bloggið, ég hef ekkert merkilegt að segja.

Það er kynning hjá mér á Sunnudaginn allir velkomnir, vítamin, fæðubótarefni, orkudrykkir og snyrtivörur, stuð og glens ofl í boði.

Kannski kemur bloggöndin yfir mig fljótt þá mun ég skella meiru hingað inn.

Kveðja

Ellý

Halló gott fólk.

Já nú er hellingur að gera alls staðar, merkilegt hvað allt verður skemmtilegt og spennandi þá. Reddaði júní skemmitlega, sá fram á að það verður ansi rólegt í dagmömmuvinnunni í júní og þá ákvað ég ásamt vinkonu minni að starta heilsuklúbb á Akranesi í júní. Það er öllum velkomið að vera með bara hafa samband við mig og fá meiri upplýsingar.

 3. júní kemur hingað frábær kona með heilsukynningu hérna hjá mér, svaka spennt fyrir því.

 Já svo það verður bara vonandi fjör í júní.

Júlí er svo sumarfrís mánuðurinn minn, þá ætla ég að Herbalifeast helling, fara helst með fyrirtækinu til Köln líka á hörku ráðstefnu.  Svo ætla ég líka að slappa af, njóta þess að hugsa bara um 2 börn, hehe. Já ég ætla svo sannarlega að njóta þess að dekra börnin mín í sumar eftir erfiðann vetur ohh hvað ég hlakka til.

Ætla pottþétt að ferðast, bara veit ekki hvert

Og hellingur í viðbót sem ég á eftir að upphugsa...

...hvað ætlið þið að gera gott fólk ??? segið mér endilega.

Kveðja

Ellý

...Gaman að sjá hvað maður hefur gert og hvað ekki, spurning hvort maður þarf að fara að bta úr einhverju. En já nú sjáið þig hvernig þessu er komið hjá mér.

Vá merkilegt, maður hefur áorkað ýmislegt, þetta dansdæmi samt alveg orðið útundan þarf að bæta úr því.

Kveðja í bili

Ellý sem þjáist af ofnæmi en elskar rigninguna

Já ég og minn þjóðarrembingur erum í fýlu núna. Eiríkur og hans rauði makki átti auðvitað að komast áfram og það gott betur

 Ég ætla í mótmælaskyni að horfa ekki á keppnina á laugardaginn huhh. Fer bara á kosningarskrifstofur og ríf kjaft.

Já það væri sniðugt, nú fékk ég góða hugmynd, ég rölti á milli kosningaskrifstofa og segist kjósa þann flokk sem lofar mér því að vinna ötullega að því að láta Ísland vinna júróvisíon, sama hvað þeir þurfi að gera. ÉG HEIMTA JÚRÓVISÍON Á ÍSLAND!!!

En já það var bara þetta sem ég þurfti að koma frá mér í þetta skiptið og líka segja að ég er aftur komin með harðsperrur, í alla hina vöðvana sem ég hélt að ég væri búin að henda í einhverju tiltektarbrjálæðinu.

Heilsingur í bili

Ellý

ÁI JÁ Ég er að farast úr harðsperrum. Sem þýðir jú eitt gott að það eru vöðvar þarna innundir spikinu einhvers staðar.

 En ég er í þvílíku átaki, sá fram á að með þessu áframhaldi drepst ég áður en ég þarf að fara að hafa áhyggjur af því að vera miðaldra. Og það mun þurfa sennilega að taka fjöldagröf (þ.e fjölda grafa til að koma mér fyrir).

En já ég semsagt er farin að brúka Herbalifeið af viti og stunda líkamsrækt. Svona í friðhelgi heimilisins til að byrja með en ég keypti mér Boot Camp bókina til að styðjast við. Og fer eftir æfingaprógramminu þar, sem er mjög gott því þar er líst á mjög fávitavænann hátt hvaða æfingar maður á að gera hve oft og lengi og þær útskýrðar í þaula. Semsagt ég hef fengið harðsperrur af öllu þessu blaðsíðufletti hehe nei nei bara grín ég var voða dugleg í gær og ælta mér að vera það næstu 15 vikurnar. og svo í 12 vikna hollum alveg uppfrá því, án þessa að láta líða daga á milli Þetta er alla vega stefnan í dag.

Já mitt markmið er "ein gröf skal nægja og það eftir miðaldursaldurinn" Gott markmið ekki satt.

Annars er eitt og annað að frétta. Margrét Rós varð tveggja ára 4. maí, kötturinn týndist sama dag (já ég týndi aftur ketti) kötturinn fannst svo aftur í gær sem er mjög gott, mikil framför frá síðasta ketti. En nú ætla ég að skipta á henni dóttur minni og fara út í góða veðrið.

Heilsingur í bili Ellý

Jamm, nú eru kosningar framundan, voða spennandi fyrir fólk eins og mig sem hefur gaman  að pæla í stjórnmálum, og þó aðallega stjórnmálaflokkum og enn helst stjórnmálafólki.

Einn góðann dag í liðinni viku kom Ormur með blað inn um bréfalúguna (hehe já það eru ekki allir þess heiðurs aðnjótandi að fá póstinn sinn með Ormi.) En þessi tiltekni pappír var auglýsing frá Vinstri Grænum.

Það er kannski ekki í frásögur færandi að maður fái svoleiðispóst þessa dagana en Magga samstarfari sem er mun gleggri en ég rak augun í það að þessir vinstri grænu hér í Norðvestur kjördæmi eru með eindæmum frjósamir. Já 18 manns voru á listanum og áttu samanlagt (nei þau lögðu sig ekki saman og eignuðust börn heldur bara eiga þessi börn með sínum mökum) 50 stykki.

 Mér finnst þetta þónokkuð. En svo fattaði ég ástæðuna, þeir eru ekki mjög skarpir hjá Vinstri grænum greyin og hafa eitthvað misskilið hvernig þeir áttu að skapa sér fylgi. Þeir hafa ákveðið að búa til sitt fylgi sjálfir. Það gengur hægt kannski en skilar sér vonandi á endanum. Já og útskýrir afhverju þeir fara stækkandi með hverju árinu, þeim fjölgar sennilega alltaf þeim VG afkvæmum sem hafa kosningarrétt.

Annars fer að líða að því að ég sé búin að ákveða hvað ég ætla að kjósa. Var nokkuð viss, fyrir helgi, vissari í gær og enn vissari í dag. Svo þetta fer allt að koma.

Reyndar finnst mér þetta hundleiðinlegt með kosningarnar og Júróvisíon .Jú maður hafði 2 ástæður til að detta í það í maí, annars vegar júró og hins vegar kosningar en neinei auðvitað þurfti að klína þessu öllu á einn og sama daginn. Bévítans svik og pretti.

Jebb ekki meira í bili, nú ætla ég að skella mér í bað eftir að hafa verið ansi dugleg að taka á smá lyftingum í bílskúrnum, varð bara að blogga í millitíðinni. Hafið það gott kæru lesendur og aðrar endur.

Kveðja

Ellý